Ustadh aliyelawiti mwanafunzi wake aongezewa miaka 15 jela

Mwalimu wa madrasa ya Kadiria iliyopo Amani mjini Zanzibar, Hamad Bakar Mohammed, anaetumikia kifungo cha miaka 15 jela kwa kosa la kumlawiti mwanafunzi wake wa kiume, ameongezewa adhabu nyingine ya miaka 15 jela na Mahakama ya Rufaa Tanzania.

Hukumu hiyo ilikuja baada mshitakiwa huyo kupinga kifungo cha miaka 15 alichopewa na Mahakama Kuu Zanzibar baada ya upande wa mashtaka kupinga uamuzi wa mahakama ya Mkoa wa Vuga, kumuachia huru mshitakiwa.

Adhabu hiyo ilitolewa na Jaji wa Mahakama Kuu Zanzibar,Abdul- hakim Ameir Issa.

Uamuzi wa kumuachia huru mshitakiwa huyo katika mahakama ya Vuga, ulitolewa na Hakimu Makame Mshamba Simgeni, baada ya kusema ushahidi uliotolewa na upande wa mashtaka hautoshi kumtia hatiani.

Jopo la majaji watatu akiwemo Jaji Kimano, Jaji Njasiri na Jaji Luonda, walitupilia mbali rufaa ya mshitakiwa kupinga kifungo hicho na badala yake ikaamua kumuongezea kifungo cha miaka 15.

Adhabu hiyo mpya sasa inamfanya mshitakiwa huyu kutumikia kiufungo cha miaka 30 jela.

Wakitoa hukumu, majaji hao walisema vitendo hivyo vimekithiri licha ya kukemewa na Serikali na kwamba adhabu hiyo itakuwa fundisho kwa wengine wenye tabia kama hiyo.

Hukumu hiyo ilitolewa Februari 13 mwaka huu huku upande wa mashtaka ukiwakilishwa na Maulid Ame Mohammed kutoka Ofisi ya Mkurugenzi wa Mashtaka.